<Отчёт о туре 2013 г.>

Двѣма убо лѣтома мимошедшема, настоящему же ся съвершающю, нынѣ сподоби мя Господь многогрѣшнааго, яко да исповѣмь вся елика быша о славнѣмь турѣ Агкылымли.

Въ лѣто 7521, индикта 7, вруцѣлѣто З. Оставльше земля Ижерскыя мѣсяца семптеврїа въ 14 день, и нощь тую въ людовозѣ1 прѣспавше и возсїавшю дни въ градѣ быхомъ Ризѣ Курскыя земля. От Петербурха же до Ригы верстъ 530. И срѣтъше ны съ трубами и съ свирѣльми по своему праву по нѣмецкому и ведоша въ градъ и ради бывше велми. Градъ же Рига великъ и каменъ и чюденъ sѣло. И прѣвлекше въ клубъ нарицаемый Хомскый, еже отъ имене славнаго американина мужа безвластника, егоже есть парсуна2 на вратѣхъ писана, прямь яко живъ, грозно ѝ видѣти. И ту прїяхомъ честь велику и олове3 различьнїи быша, яко сладъкъ олуй журавиньный4 и иная агоднаа и овощьнаа. Зане оловиньному, паче же рещи пивъ живыхъ многоразличїю въ тои земли зѣло велику быти. И пакы пїяхомъ зелїа многая травная хмѣлная. И ту угоди ны ся нощьлегъ лежати на мѣстѣ томъ, и се, нощь мразу велїю и хладу бывшю, и токмо хмѣлнымъ питїемъ спасаеми бяхомъ. И во утрїи въставше абїе5 въ аеропортъ грядохомъ, сирѣчь пристанище летецкое, и сѣдше въ самолетъ буйно къ небесемъ въспарихомъ выспрь доже и до облакъ, ови похмѣлїемъ лютымъ тужаще и скорбяще, ови же ся радующе о путномъ шествїи.

Септемврїа 16. А отъ града Ригы до града Рѣкы, латыньскымъ же языкомъ Флуменъ, тысяща и четыри ста верстъ небесы. И въ томъ градѣ жителствующемъ хавратяномъ, рекше хръватомъ, о нихже рече хранографъ яко языкъ съ руси, а законъ имуще латыньскый Петра Гугниваго, грамотѣ же пристаяще кѷрїловици6, юже непщюемъ7 древле отъ Костянтина Фїлософа явлену быти, нѣцыимъ же убо глаголющемъ яко отъ блаженааго Їеронѵма, еже есть лъжа и блядь8. Пїюще же зелїе грозньно9, рекомое ракїю. И напрасьно10 бысть дъждь великъ и крыти ся тщаще обрѣтохомъ кръчемницю и озобахомъ тамо хлѣбъ дивъный брашьно11 фряжьское12 превеликъ sѣло, иже нарещи питъцю13, питателну бо sѣло сущю, зане чьтыри сыры въ себѣ имать, имиже ся крыеть, а величествомъ съ аршинъ, юже бѣ снѣдотворьць бързо пекый въ пещи, и пакы ся въ сквотъ сыти въспятихомъ. И ту погудѣхомъ добрѣ въ погребьци рекомѣмь Подрумъ еже есть ристалище конь. Свѣту же въсходящю на утрїи възбуждьшеся и въ градъ шествовахомъ и ту олове быша и ви́на и сырове, яже пїяхомъ и ядохомъ. Бѣловъ же присно пїанъ бяше по весь часъ. Да и вси прѣизлиха пїюще быхомъ грѣшнїи.

Сице убо и Иванъ Златоустець глаголеть: «Что̀ твориши, о человѣче, бещинно и скарѣдно живый, часъ молитвеный пропивая и нравъ поганыхъ любя, тѣхъ бо есть веселїе еже упиватися, а христїяномъ егда обѣдати, тогда и пити. А ты человѣче весь день сѣдиши губя питїемъ, и ни тѣлесныхъ могый орудїй творити, ни душевныхъ, но вся на питїе предая и душю и тѣло губяй. Реченно бо въ законъ ясти и пити и въ подобно время, а не въ пїянство. Мнози же пїюще весь день губятъ аки безсловесныи скоти и звѣри, не чающе суда, ни Бога вѣдуще. И ти смѣют ны ся, яко и мы несмыслено сего не творимъ, а человѣци сїи несыти, егда не имутъ покоя пїюще, лїютъ яко во утелъ сосудъ, донелѣже возбѣснѣютъ отъ пїянства.» И пакы глаголеть: «Двѣ бо пїянству различїи. Едино же мнози хвалятъ глаголюще: той пїяница, иже упивъся спитъ. Азъ же глаголю, и кроткый бо пїяница зло творитъ. Аще ся упьетъ, спитъ яко мрьтвець, и яко болванъ валяется, и много осквернитъся и домочився смердитъ. И лежитъ въ годъ заутренїй, не мога ни главы возвести рыгая, смердя отъ многа питїя, разслабль свое тѣло мокро. И до горла яко мѣхъ налїявся. Чимъ отдѣленъ отъ поганыхъ таковый? Вижьте, коль зло есть пїанство. Аще бо кто въ томъ умретъ, съ погаными осудится. А деряживый пїяница, иже бїется и сварится, и лаетъ говѣющымъ, и боголюбцемъ поноситъ и укаряетъ.» Добрѣ убо той рече о пїанствѣ.

Въ понедѣлный же день, септемврїа мѣсяця дни 17 бывшю, поемше самовозъ14 яхомъ ся пути въ землю Словеньску. Въ тои же сторонѣ Славенїи обитовающемъ звѣрьмъ дивїимъ15, яко язъвець16 и аркуда, еже сказаеться медвѣдь. И доспѣвше града Любляны, а отъ Рѣкы до Любляны верстъ 170. И ста ны ту въ срѣтенїе панъ славенскый Примушъ, мужъ велми старъ и болѣзнивъ и тучьнъ, иже послѣди въ лѣто 7522 къ Господу отъиде на судъ. И приведъ си въ полаты и абїе допровади въ корчму, аще и ничесоже пїяй бяше, недужьнъ сый, и въ полатахъ его тую нощь вси почивахомъ. И заутра тмѣ еще сущи возбуждь и изжене17 въ часъ 4. Часоблюститель бо великъ бяше.

Дни же приспѣвшю текохомъ зрѣти градъ и за́мъкъ краля Словеньскааго иже на горѣ велицѣй. Мя же грѣшнаго Бѣловъ повлече въ розличьныя корчагы вино и оловину пити. И пїаше лихо sѣло. И вси бѣдовахомъ пїанствомь его паче прѣждьняго. Не могый бо бяше приблудама18 своима гудѣти.

И бысть видѣти страшно чюдо, яко мужю етеру19 на тръжищи сѣдящю, и предивно гудяше незримымъ образомъ, рукама бо точїю вѣяй, и ничесоже ко еже гудѣти имѣаше, обаче20 ся лїаше пѣснь Божественнаа. И пакы пилою гудяше.

И видѣхомъ въ томъ градѣ въ Люблянѣ яко градьць мьншїй, удивленъ разными картины, видѣти яко живи. Въ длѣ имать саженъ яко 90, въ преки же 30. Словущю же тому мѣсту Метѣлкову, хоро́мъ же въ немьже гудѣхомъ Мѣнза при Корыту ся нарицаеть. И все зданїе града того видѣти твердо есть и подивитися о семъ. И тамо послѣди ядохомъ супъ травный и инаа веганскаа, рекше травоаднаа. Вси бо суть пънци21 велицїи постници ничесоже еже отъ мясъ вкушающе. И ту подружїе22 Миколку пригонися именемь Еѵїенїа. И опочивше добрѣ нощь ту и на утрѣ вставше, дни же пришедъшю септемврїа 19 Крани града досягохомъ.

Крань есть градьць зѣло малъ и въ предгорїихъ сый. Отъ Любляны же до Крани верстъ 30. И тамо пънци словеньстїи сквотъ здаша въ паровознѣмь склѣпѣ. И почьстиша добрѣ питїемъ и яденїемъ и всѣмъ, и лежахомъ ту нощь едину въ градцѣ томъ, Божїею благодатїю храними.

Въ томъ же градьци видѣхомъ костелъ латынескъ внутрьуду и внѣуду, лѣпо удивленъ, аки сїаетъ, много дивитися. И пакы въ кръчемници видѣхомъ звѣри Коркодила скуру висящю. Къркодилъ же есть странноужасный змїй. Сице и лѣтописець Псковскый глаголеть, в лѣто 7090, яко того же дѣи лѣта «изыдоша коркодили лютїи звѣрїи из рѣки и путь затвориша, людеи много поядоша, и ужасошася людїе и молиша Бога по всеи земли; и паки спряташася, а иних избиша».

Мѣсяця семптембрїа 20. Отъ Крани же до Полы верстъ 300. Пола градъ отъ римлянъ древле устроенъ, подобенъ есть Риму, колисеумъ имать великъ и красенъ. Ту котове бяху мнози бещисла, ихже питахомъ грѣшнїи. Котъ же есть убо звѣрь о немъже Фисилогъ рече мышамъ супостатну быти и любитъ хорошество.

Септемврїа 21. Отъ Полы до Казалища Лютъкъ еже въ Задарѣ 450 верстъ самовозомъ. Задаръ же есть градъ на брѣзѣ. И се, вступльше въ градъ и вечеру грядущю обрѣтохомъ нарочитое мѣсто глаголемое инфошепъ и велми дивихомся, яко ни едина мужа не бяше, нъ точїю красныя дѣвки и бабы, словуще фемїнїсти, яко древле амазоняне, фемїна бо есть латыньскымъ языкомъ баба. И тамо вино чрьмное23 пихомъ, отъ негоже по реченїю тѣхъ дѣвъ калу смрадну и чьрну быти. Еже ся и събысть.

Еще же дръзну несрамно рещи о чюдеснемь походницѣ24 оправленїи еже Миколка учини Хромый, да се слышаще, навычете тако творити. Немощьно бо бяше проходъ съвершити25 обилнѣ ради окопившагося гнуса и смородъ велїй обьщьно истачающа. И муже-сь якоже древле нѣкый баснотворимый Ираклъ вземъ пьрстатицю и прѣпрость омочи дьсницю свою доже до лакътя и попьхнувый гнои добльнѣ и елма26 измыти ему, абїе вси възмогоша утробнаа испражненїа съвершити.

Илейко же порекломъ Квасъ насъ грѣшныхъ оставль отъиде въ землю Фряжскую и пакы на Русь.

Септемврїа 22. А отъ Задара до Сплита 200 верстъ. А отъ Сплита до Агконы 46 миль Бѣлымъ27 моремъ, а миля по пяти верст. Ту ядохомъ брашьно китайское. И бысть яко имущемъ намъ мусїкїйствовати въ градѣ въ Аквилѣ, еже ся протолкуеть орля, въ клубѣ Казематѣ, еже есть узьница. И отънудь не бѣ доити сего града, никтоже бо везый бяше страха ради Божїа, трусу28 бо велїю въ градѣ томь бывшю и градъ весь потребльшю, земля тутняше и горы и хлъми трясахуся и клопотанїе велїе и людїе вси Божїимъ попущенїемь погибоша, якоже древле Помпеи и Содомъ и Їерихонъ и инїи мнозїи градове иже инъгда отъ Бога потреблени, тако и сей градъ раздрушенъ бысть, нъ точїю нырища и жупелїе осташася.

Оле суетнаго и тщетнааго маловременнаго бытїа человѣческаго! Зри убо, яко вся тщетнаа суть, за еже бо прїити страшьну земля трясенїю и въ прахъ вся потварити. Сице убо и Екклесїастъ и Соломонъ глаголеть в Притчахъ и Григорїй Богословьць и Иванъ Дамаскинъ, яко: «Зрю тя, гробе, и ужасаюся твоего видѣнїа» и прочая. И пакы: «Аще бы вѣдала душа моя суету мира сего, взошла быхъ на гору высоку, и узрѣла бы гробъ свой, въздъхнула бы и рекла: прїими мя, гробе, яко мати сына своего, гробъ ми есть домъ прѣвѣчьный, червїе ми есть гости прѣлюбовьнїи, персть ми есть жизнь нетлѣннаа»; и инїи мнозїи. Не вся ли бо суть земьнаа поистиннѣ суетство и лукавьство, и еда29 не единъ ли блаженъ иже ся не родилъ?

И того дѣля въ Агконѣ госпиталъ30 обрѣтохомъ къ пренощеванїю. Имьже ся путемъ донесохомъ оттолѣ до славнаго града Флорензы, о томь азъ грѣшный ради приключившаго ми ся многаго лютааго пїанства позабыхъ, ниже вѣмъ нынѣ щисленїа верстъ отъ Агконы до Флорензы, обаче мнитьмися, яко чрезъ градъ Болонїю бысть намъ ѣхати.

Той же славный градъ Флоренза великъ sѣло, и такова не обрѣтохомъ во предписанныхъ градѣхъ: божницѣ въ немъ красны sѣло и великы, и полаты въ немъ устроены бѣлымъ каменемъ, велми высокы и хытры. И посреди града того течетъ рѣка велика и быстра велми, именемъ Рна; и устроенъ на рѣцѣ тои мостъ каменъ, широкъ велми, и съ обѣ страны моста устроены полаты. И походихомъ град-отъ весь добрѣ.

И въ томъ же градѣ ясти и пити стяжахомъ: вино доброе по 4 золотыхъ, а золотой по 100 грошь, питьца по 2 золотая за укрухъ, оловина въ кръчмахъ даже и по 5 золотыхъ, хиндѣйской же олъ блѣдъ31 по 5 золотыхъ съ полтиною, бръзоядь32 различь от 3 золотыхъ доже и до 7, а сыръ гуттусъ на купилищи33 16 золотыхъ за фунтъ. И ту стояхомъ три дни. А отъ Флорензы до Ливорны паровозомъ 120 верстъ, а оттамо до Олбїи моремь 60 миль, и бывшю попутну вѣтру утро досягохомъ кралевства Сардинскааго. Обаче бысть путное сїе шествїе печално и унылниво, зане пиво ся фряжское несладко яви.

Сардинїа есть островъ великъ, въ длѣ верстъ 260, въ преки же 105, отъ рыбы етеры ся нарицаеть. И въ томъ островѣ ражается вино доброе и овощь всякый. И всякый сыръ ту есть: вялый, и губленый, и губчатый, и кыслый, и сметанный, и сыръ крѣпкый. Сыръ же козей лѣпѣе всѣхъ сыръ есть къ питанїю тѣлесному. И благоюханїе чюдно истачаяй, и есть сыр-отъ лучїй и болїй отъ всѣхъ сыръ, сущихъ на земли под небесемъ, нѣсть бо такого сыру никъдѣже. Такожде и сыръ тамо есть предивенъ и чюденъ, иже съ червїемь, а нарещи ѝ казу марцу, еже есть сыръ гнилъ и смрьдящь, исплънь бо червїй. И тако съ червїемь сыр-отъ ядять и за велми ся искусное брашно почитаеть.

26 септемврїа. От Олбїи же есть паровозомъ до Сассаръ верстъ яко 100. И ту пояхомъ добрая клюсята34 и потъщавшеся къ сквоту текохомъ нарицаемому Паггеа, иже въ Портѣ Торесѣ, от Сассаръ же верстъ 20 и 2. Фрязи же лѣпо поздравльше и обрекошася въ вечеръ рускаго брашьна исправити, еже нарядити вечерояденїе35 руское. Уготовлену же во мнозѣ вещей гобзованїя36 брашну и поставленнымъ чарамъ златымъ и належащю времени ясти, и се, траву глаголемую спинатъ на столѣхъ поставиша: мняху бо спинатъ брашно руское быти. И ту пренощевахомъ въ шатърѣхъ.

Септембрїа 27. От Порта Тореса до Вилачидры двѣма самовозома верстъ яко 330 на угъ по лукоморїю. Никъдѣ же видѣти человѣка, и sвѣрїй тма: козы, кравы, овцѣ и прочая. И видѣхомъ дивныя нурагы бещисла.

И помыслихъ въ срьдцы своемь яко поистинѣ есть земля та Богомъ обѣтована и благословена есть от Бога всѣмъ добромъ: пшеницею и виномъ и масломъ и всякимъ овощомъ обилна есть зѣло, и скотомъ умножена есть; даже и овцамъ бо непщую и скотомъ двашьды ражатися лѣтомъ; суть же и виногради мнози по пригорїемъ тѣмъ, и древеса много овощнаа стоятъ бещисла, масличїе, смокви, и рожци, и яблони, и черешни, и всякый овощь ту есть. И воды добры суть в мѣстѣ томъ и всѣмъ здравы. Ту ся купахомъ и мы грѣшнїи недостоинїи. Неисказанна есть земля та Сарданїа!

Виллачидра же градъ есть на сусѣ, отъ моря вдалѣ 40 верстъ, въ горахъ, обиленъ же есть всѣмь добромъ. И облегохомъ въ замъцѣ рыцеря сардинскаго Фабїа. И начатъ по полатамъ водити и показовати красованїе полатное и скарбы своя, и скрывъ сундукъ и показа вся сокровищя своя. И исшедъ ис тоѣ полаты и поведе в столовую полату и начя чествовати всякими разными пойлы.

Въ пятъкъ же, септемврїа 28 дне, концерту быти имущю въ Могорѣ, и не бысть, бывшю бо инъдѣ, рещи Виласорѣ, а отъ Вилачидры до Виласора верстъ 20, отнюдуже до Святаго Сперата верстъ яко 7 самовозомъ, идѣже пренощевахомъ въ полатахъ славнаго рыцеря Фабрицїа, а отъ Святаго Сперата до Калїаръ града столнаго 20 верстъ на пладьнь. И той градъ величествомъ вышьши тѣхъ градовъ прежнихъ.

Септемврїа же 29, коньчинѣ днїй турьныхъ бывши, въ томъ градѣ въ кърчьмьници сѣдяхомъ на многочасїи, мудящымъ бо ерыжнымъ37, иже неизреченныя благовонныя яди приношаху, такожде и питїе, яко дивихомся глаголюще яко николиже въ дому отецъ нашихъ таковых ядей не вкушахомъ ниже питїя испихомъ. И ядохомъ грѣшнїи всякое брашно различь еже от морь, яко афтопудъ38 и колихия39 и иныя нечистыя гады, иже срамно и нарещи. По яденїи же мусикїйствовахомъ въ клубѣ Богемїенѣ тѣснотѣ велицѣ сущи народомъ. И ту даша 400 золотыхъ, а золотой еуропьской по 43 рубли с полтиною бысть. И вси мужїе сардиньстїи съ любовїю ны велїею проводиша и слезы отъ очїю испускаху.

А отъ Калїаръ до Рима 420 верстъ аеромъ. Ту пребыхъ дни 2. Отъ Рима же до Кыева тысяща и 6 сотъ 80 верстъ. И бысть того дни, вонь40 же ми отвозитися, велїе мудѣнїе малоросскихъ аероходныхъ судъ, чесого дѣля не прилучи ми ся оставити Рима, дондеже добру и покосну вѣтру възвѣяти. Въ обители въ Кыевѣ припочинухъ грѣшный. А отъ Кыева до Питербуръха тысяща и 20 верстъ есть.

Написахъ же вся сїа истинно и нельстьно, в лѣто 7524, на святаго пророка Аггеа, индикта 10, вруцелѣто Д. А иже аще дрьзнетъ рещи яко не бысть еже написахъ, да будеть Богу противникъ.

1 автобусе
2 портрет
3 пива̀
4 клюквенный
5 тотчас
6 глаголице
7 полагаем
8 заблуждение
9 виноградное
10 внезапно
11 пищу
12 итальянское
13 пиццу
14 автомобиль
15 диким
16 барсук
17 изгнал
18 синтезаторы Kaoss Pad и Kaossilator, на которых играл Белов
19 некоему
20 однако
21 панки
22 жена
23 красное
24 отхожего места
25 справить нужду
26 как только
27 Адриатическим
28 землетрясению
29 разве
30 хостел
31 IPA, индийский бледный эль
32 фастфуд
33 рынке
34 лошадей
35 ужин
36 изобилия
37 слугам
38 осьминог
39 улитка
40 в который